Omsendbriewe

 

27 Januarie 2006

OMSENDBRIEF: ADV 9/2006 Aan: Die Skriba Ringsdiakensvergadering

Geagte Br/Sr

JAARVERSLAE VAN DIE GEMEENTES AAN DIE RINGSDIAKENSVERGADERING

 

Dit is weer daardie tyd van die jaar. Die tyd wat gemeentes se jaarverslae ontvang en verwerk moet word. Ek wil u baie sterkte toebid met die taak. ‘n Diakensvergadering en ‘n verslagvorm is nie altyd ‘n werkbare kombinasie nie. Hier by die kantoor van die Kommissie van die ADV weet ons dat dit nie altyd maklik is om gemeentes te motiveer om ‘n jaarverslag te voltooi en nog betyds in te dien nie.

Daarom wil ek u sterkte toewens met die taak en u by voorbaat bedank vir die tyd en die energie wat u gaan spandeer om hierdie taak suksesvol af te handel. 

Ek wil u tog net vriendelik maar baie dringend versoek om die samevatting van hierdie jaarverslae in ‘n baie ernstige lig te beskou. Daar is ‘n paar belangrike redes agter hierdie versoek:

• Die inligting wat ons uit hierdie jaarverslae bekom gaan bepalend wees vir die Kommissie van die ADV se beplanning rondom die diens van barmhartigheid vir die volgende drie jaar.
• Sorg asseblief dat u al die gemeentes se samevattende verslae ontvang
• Sorg asseblief dat die inligting volledig is. Veral die gedeeltes wat handel oor (1) die statistiek en (2) die dienste wat in u Ring deur die diakens aangebied word. Probeer om so ver moontlik raaiwerk van enige aard te vermy.
• Moenie samevattende verslae wat u sukkel om in die hande te kry weglaat uit u finale verslag aan die ADV nie. In hierdie oefening is getalle baie belangrik en ons sal graag ‘n finale verslag wil saamstel wat so na as moontlik aan honderd persent korrek is. Oefen dus maar druk uit waar druk nodig is. Indien dit nodig is kan u die hulp van die Ringskommissie inroep om lakse gemeentes aan te praat om hulle verantwoordelikheid na te kom.

Baie sterkte met hierdie groot taak!

 

Groete in Christus

Dr WJ Coetzer
Sekretaris: Kommissie van die ADV